Samband English

Strengur og Quadrant 20. september kl. 21

STUND & STAÐUR

Dags: Fimmtudagur 15. september 2011

Dagana 20.-22. september verða haldnir óvenjulegir tónleikar á Ísafirði, Patreksfirði og Hólmavík. Þar er um að ræða lagaflokkinn STRENG eftir Tómas R. Einarsson og mynd/tónverkið QUADRANT eftir Jón Sigurpálsson.

 

QUADRANT, eða Hringfjórðungur, er mynd- og tónverk, samið fyrir slagverksleikara, 5 blindramma og málarabretti. Það var frumflutt í Amsterdam 1983 og síðan í Tókíó nokkrum árum síðar en hefur aldrei verið flutt á Íslandi. Höfundurinn er Jón Sigurpálsson myndlistarmaður og safnvörður á Ísafirði en hann hefur fengist við tónlist síðan á unglingsárum. Matthías MD Hemstock flytur verkið.

 

Lagaflokkurinn STRENGUR, fyrir kontrabassa, slagverk, vatnshljóð og vídeó var frumfluttur á Listahátíð í Reykjavík í maí s.l. og hlaut frábærar viðtökur. Tómas R. Einarsson samdi tónlistina og spilar á kontrabassa, Matthías MD Hemstock sér um slagverk og þriðji meðlimurinn í bandinu eru svo ár, lækir, stöðuvatn og haf af ættarslóðum Tómasar, meðal annars við Steingrímsfjörð. Vatnshljóðin leika undir og spila með þeim félögum. STRENGUR kom út á geisladiski og DVD s.l. vor og hefur fengið afar góða dóma.

 

Á YouTube má sjá brot af frumflutningi Strengs á slóðinni: vimeo.com/23252699

 

Tónleikarnir verða sem hér segir:

Edinborgarhúsið Ísafirði, þriðjudagur 20/9 kl. 21
Skjaldborg Patreksfirði, miðvikudagur 21/9 kl. 21
Bragginn Hólmavík, fimmtudagur 22/9 kl. 21

 

Miðaverð: kr. 1500,-

 

Vestfirsk menning styrkir verkefnið.





© Edinborg Menningarmiðstöð | Vefsmíði: Styx ehf. | CMS: WebSmith
Merki DressUpGames